ဒီမိုကရေစီအရေး စိတ်အေးချင်ပါပြီ
အောင်လင်းထွဋ်| ယနေ့ မြန်မာ့နိုင်ငံရေးသည် အလွန်သိမ်မွေ့ နက်နဲသော အချိန်သို့ ရောက်နေသည်ဟု ဆိုလျှင် မှားမည် မထင်ပါ။ ပြည်သူလူထု ကြိုက်သည် ဖြစ်စေ၊ မကြိုက်သည် ဖြစ်စေ၊ ၂၀၀၈ ခုနှစ် ဖွဲ့စည်းပုံအရ ဆိုပြီး စစ်တပ် ကျောထောက် နောက်ခံပေးထားသော စစ်ဗိုလ်လူထွက်အများစုနှင့် ဖွဲ့စည်းထားသည့် အစိုးရ၊ ပြည်သူ့ လွှတ်တော်၊ အမျိုးသား လွှတ်တော် ဆိုပြီး ပေါ်ပေါက် နေသည်ကို မြင်တွေ့ ရပါသည်။
နှစ်ပေါင်းများစွာ တော်လှန်ရေးကောင်စီ၊ မဆလ၊ နဝတ၊ နအဖ ဟု အမည်အမျိုးမျိုးတပ်ကာ စစ်တပ်အနေဖြင့် မြန်မာနိုင်ငံကို အာဏာရှင်စနစ်ဖြင့် ပုံစံအမျိုးမျိုးပြောင်း၍ အုပ်ချုပ်ခဲ့ရာမှ ယနေ့ အမည်ခံ ဒီမိုကရေစီစနစ်ဖြင့် အုပ်ချုပ်ရန် ခြေလှမ်းစလှမ်းနေပြီဖြစ် သည်။
ပြည်သူလူထုအနေဖြင့် အာဏာရှင်ကြီးဦးနေဝင်း ၏ ၂၆ နှစ်ကြာ အုပ်ချုပ်ခဲ့သော မဆလ အစိုးရကို ၁၉၈၈ ခုနှစ်က လူထုဆန္ဒပြ သည့် နည်းဖြင့် ဖြုတ်ချနိုင်ခဲ့သော်လည်း အကြောင်းအမျိုးမျိုးကြောင့် ဒီမိုကရေစီစနစ်ကို လက်လွှတ်ဆုံးရှုံးခံခဲ့ရပါသည်။
ဆက်လက်၍ ဗိုလ်ချုပ်မှူးကြီး စောမောင် ၊ ဗိုလ်ချုပ်မှူးကြီး သန်းရွှေ တို့က နဝတ၊ နအဖ ဆိုပြီး ၂၃ နှစ်နီးပါး ရက်စက် ကြမ်းတမ်းစွာ အစွမ်းကုန် ဖိနှိပ် အုပ်ချုပ်ခဲ့သည်ကိုလည်း တွေ့ခဲ့ရပြီး ဖြစ်ပါသည်။
၂၃ နှစ် နီးပါး စစ်အာဏာရှင် အစိုးရ အုပ်ချုပ်ပြီးသည် နောက်တွင် မြန်မာနိုင်ငံသည် အလုံးစုံ ချွတ်ခြုံကျပြီး ပြိုကျတော့မည့် အိမ်အိုကြီးသဖွယ် ဖြစ်ခဲ့ရသည်ကို မည်သို့မျှငြင်း၍ မရပါ။ ထို့ကြောင့် လက်ရှိတာဝန်လွှဲပြောင်း အမွေဆက်ခံသူ သမ္မတကြီးဦးသိန်းစိန် ခေါင်းဆောင်သော စစ်ဗိုလ်လူထွက်များ အနေဖြင့် မြန်မာနိုင်ငံကို အလုံးစုံ ပျက်သုဉ်းသွားသောနိုင်ငံ (Fail State) မဖြစ်စေရေးအတွက် ယခင်နှင့် မတူသော မဟာဗျူဟာ၊ နည်းဗျူဟာ များ ချမှတ် လှုပ်ရှားလာသည်ကို ယနေ့မြင်တွေ့နေရသည်။
၂၀၀၀ ပြည့်နှစ် ဝန်းကျင် ကတည်းက မြန်မာ စစ်အစိုးရသည် မြန်မာ့ နိုင်ငံရေးတွင် ဒေါ်အောင်ဆန်းစုကြည်၏ အခန်းကဏ္ဍ ကို ဘေးဖယ် ထား၍ မရကြောင်း ကောင်းကောင်း နားလည် ခဲ့ပါသည်။
ထိုအချိန်က ဗိုလ်ချုပ်မှူးကြီးသန်းရွှေ အစီအစဉ်ဖြင့် အပြောအဆို သိမ်မွေ့ပြီး ပြေပြစ်စွာ ဆက်ဆံပြောဆိုတတ်သူ ဒုတိယ စစ်ထောက်လှမ်းရေးမှူးချုပ် ဗိုလ်ချုပ်ကျော်ဝင်း ကို ဒေါ်အောင်ဆန်းစုကြည်နှင့် တွေ့ဆုံစကား ပြောရန် တာဝန်ပေးခဲ့သည်။
ဗိုလ်ချုပ်ကျော်ဝင်းသည် ဗိုလ်ချုပ်မှူးကြီးသန်းရွှေ၏ သားတပည့် အရင်းအချာတဦးဖြစ်ပြီး ၁၉၉၂ ခုနှစ် ဗိုလ်ချုပ်မှူးကြီးသန်းရွှေ အာ ဏာရရချင်း ဗိုလ်ချုပ်ခင်ညွန့်ကိုထိန်းရန် ဒုတိယ စစ်ထောက်လှမ်းရေးမှူးချုပ် အဖြစ် တာဝန်ပေး ခံရသူဖြစ်သည်။ ဗိုလ်ချုပ်ကျော်ဝင်းအား အထောက်အကူ ပြုနိုင်ရန် ဗိုလ်မှူးချုပ် သန်းထွန်းသည် နိုင်ငံရေးနှင့် တန်ပြန်ထောက်လှမ်းရေးဌာနမှ တာဝန်ယူပေးခဲ့ရပါသည်။
ထိုစဉ်က တွေ့ဆုံမှုကို ထိပ်တန်းလျှို့ဝှက်အဆင့် သတ်မှတ် ဆောင်ရွက်ခဲ့ပါသည်။
သို့သော် ကုလသမဂ္ဂ အထွေထွေ အတွင်းရေးမှူးချုပ် ၏ အထူးကိုယ်စားလှယ် ရာဇာလီ အစ္စမေးလ် လာရောက်စဉ် နိုင်ငံခြားရေးဝန်ကြီး ဦးဝင်းအောင်၏ အမှတ်မထင် ပြောဆို လိုက်မှုကြောင့် တွေ့ဆုံမှု သတင်း နိုင်ငံတကာသို့ ပေါက်ကြားသွား ခဲ့ရသည်။
ဒေါ်အောင်ဆန်းစုကြည် အပေါ် ထားရှိခဲ့သော သဘောထားအမျိုးမျိုး အာဏာပိုင်များအတွင်း ကွဲလွဲမှုများ ရှိခဲ့ပါသည်။ ထိုအချိန်က ယခု ပြည်ခိုင်ဖြိုး အတွင်းရေးမှူး ဦးအောင်သောင်း သည် ဒေါ်အောင်ဆန်းစုကြည် အား ပုဂ္ဂိုလ်ရေးအရ အမနာပပြောဆို၍ အဆန့်ကျင်ဆုံးလည်း ဖြစ်သည်။
၎င်းတို့၏ အစိုးရိမ်ဆုံး အချက်မှာ အမျိုးသား ဒီမိုကရေစီအဖွဲ့ချုပ် (NLD) ကိုသာ မြန်မာ့နိုင်ငံရေးတွင် ပါဝင် ခွင့်ပြု မည်ဆိုလျှင် ဗိုလ်ချုပ်မှူးကြီး သန်းရွှေ ပြုစု ပျိုးထောင် ခဲ့သော ပြည်ခိုင်ဖြိုးသည် မှေးမှိန်သွားပြီး နိုင်ငံရေး သေသွား လိမ့်မည်ဟု ယူဆခဲ့ကြသည်။
ထိုအခြေအနေများကြောင့် ဦးအောင်သောင်း သည် ပြည်ခိုင်ဖြိုး ဒု ဥက္ကဌ ဗိုလ်ချုပ်ကြီးစိုးဝင်းနှင့်အတူ ဗိုလ်ချုပ်မှူးကြီးသန်းရွှေ ခွင့်ပြု ချက်ဖြင့် ဒီပဲယင်း အရေးခင်းဖန်တီးပြီး အစိုးရ နှင့် ဒေါ်အောင်ဆန်းစုကြည်၊ NLD ဆွေးနွေးပွဲကို ရပ်ဆိုင်းစေခဲ့ပါသည်။
ဒီပဲယင်း အရေးခင်းကြောင့် နိုင်ငံတကာ၏ ပြင်းထန်သော ဖိအားများ ဖြစ်ပေါ်လာရာ တဖန်ပြန်လည်၍ ဒေါ်အောင်ဆန်းစုကြည်ကို ပြည်ထဲရေးဝန်ကြီး ဗိုလ်မှူးကြီး တင်လှိုင် ခေါင်းဆောင်သောအဖွဲ့နှင့် တွေ့ဆုံဆွေးနွေးစေပြီး အမျိုးသား ညီလာခံတွင် NLD ပါဝင်ရေး ဆွေးနွေးခဲ့ပါသည်။
အဆင်ပြေခဲ့ပြီး နိုင်ငံရေးအကျဉ်းသားများ လွှတ်ပေးမည်ဟု ကတိပေးခဲ့ပြီးကာမှ ရက်ပိုင်းအလို ဗိုလ်ချုပ်မှူးကြီးသန်းရွှေ စိတ်ပြောင်းပြီး NLD အမျိုးသားညီလာခံတက်ပြီးမှ လွှတ်ပေးရန် စဉ်းစားမည်ဆိုသောကြောင့် ဒေါ်အောင်ဆန်းစုကြည် ၏ “ရှင်တို့ စစ်သားတွေ ဖြစ်ပြီး ကတိမတည်ဘူး” ဟူသော မှတ်ချက်ဖြင့် ဆွေးနွေးပွဲ နိဂုံးချုပ်ခဲ့ရပါသည်။
ယနေ့အချိန်အခါတွင် ဗိုလ်ချုပ်မှူးကြီးသန်းရွှေ ၏ ရည်မှန်းချက်ဖြစ်သော မြန်မာ့နိုင်ငံရေးတွင် တပ်မတော်၏ ဦးဆောင်မှု ရှိရမည် ဆိုသည့်အတိုင်း နိုင်ငံ၏ အမြင့်ဆုံးဖြစ်သော အမျိုးသား ကာကွယ်ရေးနှင့် လုံခြုံရေး ကောင်စီတွင် လက်ရှိစစ်တပ် ခေါင်းဆောင်များနေရာ အများဆုံး ယူထားသကဲ့သို့ အစိုးရအဖွဲ့တွင်လည်း အရေးပါသော ဝန်ကြီးဌာနများကို ရယူထားပြီး ဖြစ်ပါသည်။ ထို့အပြင် စစ်တပ် အနေဖြင့် လွှတ်တော် နှစ်ရပ်လုံးတွင် ၂၅ ရာခိုင်နှုန်းကိုလည်း ရယူထားပြီး ဖြစ်သည်။
၁၉၉၂ ခုနှစ် ဧပြီလ ဗိုလ်ချုပ်မှူးကြီးသန်းရွှေ စတင် အာဏာယူစဉ်ကတည်းက ပျိုးထောင်ခဲ့သော ပြည်ခိုင်ဖြိုး လူမှုရေး အဖွဲ့သည်လည်း နိုင်ငံရေးပါတီ ဖြစ်လာခဲ့ပြီး လွှတ်တော် နှစ်ရပ်တွင် အများစုအမတ်နေရာများကို ရရှိပြီး အစိုးရ အဖွဲ့ကိုပင် ဖွဲ့စည်းခဲ့ပြီးဖြစ်ပါသည်။
စာရေးသူအနေဖြင့် တင်ပြချင်တာကတော့ စစ်တပ်အနေဖြင့် သူလုပ်ချင်သည်များကို တိုက်ပွဲတပွဲ တိုက်ရန်အတွက် တိုက်ပွဲလုပ်ငန်း စည်းမျဉ်း (Battle Procedure) ချမှတ်၍ မဟာဗျူဟာ၊ နည်းဗျူဟာ ဖြင့်ဆောင်ရွက်ခဲ့ရာ အောင်ပွဲရရေး နောက်ဆုံး အခက်အခဲကို ကျော်လွှားရမည့် အချိန် ရောက်နေပြီ ဖြစ်ပါသည်။
အဆိုပါ အခက်အခဲကို ကျော်နိုင်ရန်အတွက် ဒေါ်အောင်ဆန်းစုကြည် မပါဝင်လျှင် မဖြစ်နိုင်သည့် အခြေအနေ ရှိပါသည်။ ထို့ကြောင့် မြန်မာနိုင်ငံကို အလုံးစုံ ပျက်သုဉ်းသွားသောနိုင်ငံ မဖြစ်စေရန် လက်ရှိအစိုးရသည် မည်သည့် အချိန်ကမျှ မပြောဆို မလိုက်လျော ခဲ့ဘူးသော အခြေအနေ များကို လျှော့ပေးနေသည်ကို တွေ့နေရပါသည်။ လက်ရှိ နိုင်ငံရေး အခင်းအကျင်းကို ကြည့်လျှင် ဒေါ်အောင်ဆန်းစုကြည်နှင့် သမ္မတ ဦးသိန်းစိန်တို့ အပေးအယူ မျှနေသည်ဟု ဆိုရပါမည်။
လွှတ်တော်အတွင်း နိုင်ငံရေးဇာတ်ခုံမှနေ၍ NLD ဝင်ရောက် လှုပ်ရှားမည့် အရိပ်အမြွက်များ တွေ့မြင်နေရပြီး အနှစ်၂၀ ကျော် ဒီမို ကရေစီ ရရှိရေးအတွက် အသက်ပေး ထောင်အကျခံ ဘဝပေါင်းများစွာ စွန့်လွှတ်စွန့်စား ပေးဆပ်ပြီး ပြည်သူလူထုအတွက် အနစ်နာ ခံခဲ့သော NLD သည် ယခုအခါတွင် ယခင်ကနှင့်မတူ စစ်ဗိုလ်လူထွက်အစိုးရနှင့် လွှတ်တော်အတွင်းမှနေ၍ ဒီမိုကရေစီရရှိရေး တိုက်ပွဲ ဝင်ရန် တာစူနေပြီ ဖြစ်သည်။
စစ်ကျွန်ဘဝမှ လွတ်မြောက် လိုသော အစိုးရ အဖွဲ့အတွင်းနှင့် စစ်တပ် အတွင်းမှ ဒေါ်အောင်ဆန်းစုကြည် ကို ထောက်ခံသူ အများလည်း မဝံ့မရဲဖြင့် ခေါင်းလေးတွေ ထောင်လာ နေကြပါသည်။
အကယ်၍သာ အနှစ်၂၀ ကျော် ဒေါ်အောင်ဆန်းစုကြည် ဆန့်ကျင်ရေးမှိုင်း အတိုက်ခံထားရသော စစ်အစိုးရအတွင်းမှ အဆင့်အလွှာ အမျိုးမျိုးကို စည်းရုံးနိုင်မည်ဆိုပါက ဒီမိုကရေစီ ရရှိရေး မကြာတော့ဟု ပြော၍ ရပါသည်။ NLD သည် ကိုယ်ကျိုးမဖက် စွန့်လွှတ်စွန့်စားနေသော နိုင်ငံရေးပါတီကြီး ဖြစ်သည်။
လက်ရှိစစ်အစိုးရအား နိုင်ငံတကာ မျက်နှာစာတွင် ခေါင်းထောင်နိုင်ရန် အထိုက်အလျောက် ထောက်ပံ့မှု ပေးခဲ့သည့်အတွက်ကြောင့်လည်း အပြန်အလှန်နားလည်မှု တစ်စုံတရာ ရသည်ဟု မြင်ပါသည်။ အကြမ်းမဖက်သော လမ်းစဉ် မေတ္တာတရားဖြင့် ချဉ်းကပ် နေသည် ဟုလည်း ရှုမြင်ပါသည်။
သို့သော် ဒီမိုကရေစီအရေး စိတ်ကူးယဉ်နေယုံမျှနှင့် မည်သို့မျှဖြစ်မလာနိုင်ပါ၊ အလုပ်လုပ်မှ ရနိုင်မည်ဟု နားလည်ပါသည်။ အသိမ် မွေ့ဆုံး နည်းဖြင့် ပြုပြင်ပြောင်းလဲနိုင်ရေး အထူးလိုအပ်ပါသည်။
စစ်တပ်သည် နိုင်ငံရေးကို စစ်ပွဲတပွဲဆင်နွဲနေသကဲ့သို့ ရန်သူ့တောင်ကုန်းကို သိမ်းပိုက်နိုင်ရန် ရန်သူ၏အင်အား တည်နေရာ လုပ်ဆောင်မှု ၊ ပြည်တွင်းပြည်ပ နိုင်ငံရေး ရာသီဥတုအနေထား ၊ ဘယ်ဘက်ကတိုက်ရမလား၊ ညာဘက်က တိုက်ရမလား ဆိုသည့် မြေပြင်အနေအထား သတင်းအချက်လက်များကို စုဆောင်းထားပြီး ပြင်ဆင်နေပါပြီ။
NLD အနေဖြင့်လည်း စစ်အမြင် စစ်အတွေးအခေါ်ရှိသော လက်ရှိအစိုးရနှင့် စစ်တပ်ကို ဒီမိုကရေစီအရေး မည်သို့ဆွဲဆောင် စည်းရုံး သွားသည် ဆိုသည့် သေနင်္ဂနည်းဗျူဟာများ ရှိလိမ့်မည်ဟု ယုံကြည်ပါသည်။ အစိုးရနှင့်စစ်တပ် အတွင်း၌ လက်ရှိနိုင်ငံရေးဗျူဟာ ကို ခေါင်းဆောင်များမှတဆင့် ရှင်းပြထားပြီး အသုံးအနှုန်းကအစ ဆောင်ရန်ရှောင်ရန် လိုက်နာရန်တို့ကိုညွှန်ကြားပြီးဖြစ်ပါသည်။
ပြည်တွင်း ပြည်ပ မြန်မာ့အရေး လှုပ်ရှားသူများနှင့် ပြည်သူ လူထုအနေဖြင့် ဒေါ်အောင်ဆန်းစုကြည်နှင့် NLD ကို မည်သို့ ဝိုင်းရံပံ့ပိုးပြီး ဘာတွေကို ရှောင်၊ ဘာတွေကို ဆောင် ရမည် ဆိုသည်ကို လမ်းညွှန်မှု ပြုစေလိုပါသည်။
ဦးဆောင် လမ်းညွှန်မှုများ မရှိခဲ့ပါလျှင် ဒေါ်အောင်ဆန်းစုကြည်နှင့် NLD ဘက်မှ ရပ်တည် ထောက်ခံ သူများအနေဖြင့် တယောက်တပေါက်ဖြင့် ညီညွတ်မှုများ ပျက်ပြားနိုင်ပါသည်။
အလားတူ စစ်ဗိုလ်ဟောင်းများအစိုးရကိုလည်း လျှော့၍ မတွက်သင့်ပါသည်။ လက်ရှိအခြေအနေသည် လွန်ခဲ့သော ၁၀နှစ်က အခြေအနေမျိုးနှင့် ခပ်ဆင်ဆင်ဖြစ်နေပါသည်။ ထိုစဉ်ကတော့ ဒေါ်အောင်ဆန်းစုကြည် ကို အမျိုးသားညီလာခံ၌ စစ်အစိုးရ နှင့် ပူးပေါင်းရေး ဖြစ်ပြီး ယနေ့အချိန်မှာတော့ ၂၀၀၈ ခုနှစ် ဖွဲ့စည်းပုံအရ ပေါ်ပေါက်လာသော အစိုးရ နှင့် ပူးပေါင်းရေး ဖြစ်ပါသည်။
ဒေါ်အောင်ဆန်းစုကြည် နှင့် NLD ကို ပြည်သူက အကြွင်းမဲ့ ယုံကြည်ပြီး ဖြစ်ပါသည်။ စစ်တပ်၏ လှည့်စားမှု အမျိုးမျိုး ကိုလည်း ကောင်း စွာနားလည် သဘောပေါက်ပြီးသူများလည်း ဖြစ်သည်။
စာရေးသူအနေဖြင့် အတွေ့အကြုံအရ သံသယဖြစ်စရာလေးတွေ တွေ့နေရပါသည်။ သမ္မတကြီး ဦးသိန်းစိန် သာ လွတ်လွတ် လပ်လပ် ဆုံးဖြတ်ပိုင်ခွင့် ရှိခဲ့မည်ဆိုပါက အကျဉ်းသားလွှတ်ရေးကိစ္စ ယခုကဲ့သို့ တုံ့ဆိုင်းနေစရာ အကြောင်း မရှိပါ။ အလားတူ တိုင်းရင်းသားအရေး ငြိမ်းချမ်းရေးကိစ္စများတွင် ယခုပုံစံမျိုး မလှုပ်ရှားနိုင်ပါ။ ယခုလက်ရာ ခြေရာများသည် စစ်အာဏာရှင် ကြီး ဗိုလ်ချုပ်မှူးကြီးသန်းရွှေ၏ လက်ရာများနှင့်တထေရာတည်း တူနေပါသည်။
စာရေးသူတို့ ရှိစဉ်ကတည်းက ဗိုလ်ချုပ်မှူးကြီးသန်းရွှေ သည် အကွက်တကွက်ကို သူရွှေ့တော့မည် ဆိုလျှင် သတင်းစာ၊ ဆောင်းပါးများ၊ အနီးကပ် အရာရှိကြီးများ မှတဆင့် သူလုပ်မည့် ကိစ္စများကို သတင်း လွှင့်တတ်ပါသည်။
ထို့နောက် အာဏာပိုင်များ နှင့် အရပ်သူ အရပ်သား များအတွင်းမှ ထိုသတင်းအပေါ် တုံ့ပြန်ချက်ကို နားထောင်ပြီး လူတွေက သူ ဘာများ လုပ်မည်လည်း ဆိုသည့် မေးခွန်းများအပေါ် ကျေနပ်နေတတ်သူ တဦး ဖြစ်သည်။
တနည်းအားဖြင့် ပြည်သူလူထုအား စိတ်ဓာတ်စစ်ဆင်ရေး လုပ်ခြင်းပင်ဖြစ်ပါသည်။ ယခုလည်း တကယ်စိတ်ကောင်း စေတနာဖြင့် နိုင်ငံရေး အကျဉ်းသား လွှတ်ပေးသကဲ့သို့ နာမည်ကြီး ကိုဇာဂနာနှင့် အကျဉ်းသား၂၀၀ ကျော်ကို လွှတ်ပြပြီး အသာလေး ချိုထား လိုက်ပါသည်။
ငြိမ်းချမ်းရေးကိစ္စမှာလည်း ကချင် လွတ်လပ်ရေး တပ်မတော် (KIA)ကို ရှင်းရန် ကျန်တိုင်းရင်းသားများကို အချိုသပ်ထားလိုက် သည်။ ယခုအထိ ဗိုလ်ချုပ်မှူးကြီးသန်းရွှေ စစ်တပ်က တရားဝင် အနားယူသည့် စစ်ရာထူးခန့်ချုပ် အမိန့်အတွက် မထုတ်ပြန်ရသေးကြောင်း သတိပြုစေလိုပါသည်။
စာရေးသူအနေဖြင့် မိချောင်းမင်း ရေခင်းပြနေခြင်း မဟုတ်ပါ။ ပညာရှိ သတိဖြစ်ခဲ ဖြစ်မည်စိုးရိမ်၍ တင်ပြနေရခြင်း ဖြစ်ပါသည်။
NLD လွှတ်တော်အတွင်း ဝင်ရောက်သည်ကို ထောက်ခံပါသည်။
ယခုကဲ့သို့ နည်းလမ်းကို ရွေးချယ်မှုသည် ပြည်တွင်းရှိ ပြည်သူ လူထုအတွက် လက်ရှိအစိုးရနှင့် ရင်ဆိုင်ရာတွင် အကောင်းဆုံးနည်းလမ်းကို ရွေးချယ်လိုက်ခြင်းဟု ထင်ပါသည်။
အရှေ့အလယ်ပိုင်း အာရပ် နိုင်ငံများကဲ့သို့ အကြမ်းဖက်မှုများမှလည်း ရှောင်ရှား လိုက်ရာ ရောက်ပါသည်။
စစ်ကျွန်ဘဝမှ လွတ်မြောက်လိုသော စစ်သည်များနှင့် မိသားစုများကလည်း NLD ကို ကြိုဆိုကြမှာ အမှန်ပါ။
သဘောထား တင်းမာသူ ခေါင်းဆောင်ကြီးလည်း အသက်အရွယ်အရ တရားရရန် အချိန်တန် နေပြီဖြစ်၍ မြန်မာနိုင်ငံ အနာဂါတ် မျိုးဆက်သစ် လူငယ်များအရေး ရှေးရှုပြီး သံဝေဂ ရသင့်ပါပြီ။
မြန်မာ့နိုင်ငံရေးနှင့် ပတ်သက်၍ စာရေးသူ သိရှိကြုံတွေ့ခဲ့ရသည်များကို တင်ပြခြင်းသာဖြစ်ပါသည်။
ပြည်သူအားလုံးလည်း ဒီမိုကရေစီ အရေး စိတ်အေးချင် ကြပါပြီ။ ။
(စာရေးသူ အောင်လင်းထွဋ်သည် ဗိုလ်မှူးဟောင်း တဦးဖြစ်သည်။ တန်ပြန်ထောက်လှမ်းရေး အရာရှိ၊ အမေရိကန်နိုင်ငံ ၀ါရှင်တန်မြို့ရှိ မြန်မာသံရုံး၌ သံမှူးကြီး စသည့် တာဝန်များ ထမ်းဆောင်ခဲ့ပြီး၂၀၀၅ ခုနှစ်တွင် အမေရိကန်၌ နိုင်ငံရေးခိုလှုံခွင့် တောင်းခံခဲ့သည်။)
0 ယောက်ရဲ့ထင်မြင်ချက်:
Post a Comment