မြောက်ပိုင်းတိုင်းမှူးနှင့် ဘာသာရေးခေါင်းဆောင်များ ကချင်တပ်အရေး ဆွေးနွေး

မြောက်ပိုင်းတိုင်းမှူးနှင့် ဘာသာရေးခေါင်းဆောင်များ ကချင်တပ်အရေး ဆွေးနွေး

ဖနိဒါ | ချင်းမိုင် (မဇ္ဈိမ)။ ။ စစ်အစိုးရနှင့် ကချင်အမျိုးသား လွတ်မြောက်ရေး အဖွဲ့အကြား နယ်ခြားစောင့် တပ်အရေး သဘော ကွဲလွဲမှုအပေါ် ညှိနှိုင်းရန် အတွက် မြောက်ပိုင်းစစ်တိုင်းမှူး ဗိုလ်ချုပ်စိုးဝင်းနှင့် ကချင် ခရစ်ယာန် ဂိုဏ်းပေါင်းစုံတို့ ယမန်နေ့က ဆွေးနွေးခဲ့ကြသည်။

မြစ်ကြီးနား အောင်နန်း ရိပ်သာ ရပ်ကွက်ရှိ ကာသိုလိပ် St. Columban ဘုရားရှိခိုးကျောင်းဓမ္မာရုံတွင် ဆွေးနွေးပွဲ ကျင်းပရာ ဗိုလ်ချုပ်စိုးဝင်းနှင့် ဌာနဆိုင်ရာ ကိုယ်စားလှယ်များ၊ မြစ်ကြီးနားမြို့ ခရစ်ယာန်ဂိုဏ်းပေါင်းစုံ (Myitkyina Christian Council - MCC) ခေါင်းဆောင်များ၊ ကေအိုင်အို ဒုဥက္ကဋ္ဌ-၂ ဒေါက်တာတူးဂျာတို့ ပါဝင်ကာ ၃ နာရီကြာ တွေ့ဆုံခဲ့ကြသည်။

မြောက်ပိုင်းတိုင်းမှူးက ဖွဲ့စည်းပုံအခြေခံဥပဒေ စာအုပ်ကိုကိုင်ကာ ၂၀၁၀ ခုနှစ် ရွေးကောက်ပွဲ နောက်ပိုင်း နယ်ခြားစောင့် တပ်ပြောင်းလဲခြင်း မရှိသော ငြိမ်းချမ်းရေး အဖွဲ့များ၏ စစ်တပ်များသည် တရားဝင်တော့မည် မဟုတ်ကြောင်း ပြောဆို သွားသည်။

နအဖက ကချင်အထူးဒေသ (၂) ကေအိုင်အို၏ စစ်တပ်ဖြစ်သော ကချင် လွတ်မြောက်ရေး တပ်မတော် (ကေအိုင်အေ) ကို မြန်မာ့တပ်မတော် ကိုယ်စားလှယ်များ အုပ်ချုပ်မှုတွင် ပါဝင်စွက်ဖက်မည့် နယ်ခြားစောင့် တပ်အဖြစ် အသွင်းပြောင်းကာ အင်အားကိုလည်း လျော့ချစေလိုသည်။ သို့သော် ကိုယ်ပိုင်အုပ်ချုပ်ခွင့်နှင့် လက်ရှိ အင်အား အတိုင်းထား ရှိလိုသော ကချင်ဒေသ၏ အကြီးမားဆုံးအဖွဲ့က “ကချင်ဒေသ လုံခြုံရေးတပ်“ (Kachin Regional Guard Force - KRGF) အဖြစ်သာ လုပ်လိုကြောင်း တုံ့ပြန်ထားသည့်နောက် ယခု တွေ့ဆုံမှု ဖြစ်ပေါ်လာခဲ့သည်။

အစည်းအဝေး တက်ရောက်ခဲ့သူတဦးက မဇ္ဈိမသို့ ပြန်လည်ပြောပြရာတွင် “ဗိုလ်ချုပ်စိုးဝင်းက ကေအိုင်အိုတို့ တောင်းဆိုထားတဲ့ KRGF က အဆင့်နိမ့်သွားတယ်၊ ကချင်ပြည်နယ်လောက်ပဲ ဖြစ်သွားမယ်။ အခု သူတို့ပြောတာတွေက အဆင့်မြင့်တယ်ပေါ့။ နိုင်ငံတော် အဆင့်ဖြစ်အောင် လုပ်နေတာတဲ့။ KRGF အဆင့်နိမ့်ရင်တော့ အကျိုးမရှိဘူးဆိုပြီး ပြောလာတယ်” ဟု ပါရှိသည်။

အခြားသော အစည်းဝေး တက်သူတဦးကလည်း “တကယ်လို့ နယ်ခြားစောင့်တပ်အဖြစ် အသွင်ပြောင်းလိုက် မယ်ဆိုရင် လက်ရှိ ရှိနေတဲ့ ကေအိုင်အို ဆိုတဲ့ နာမည်တွေက ရှိဦးမလားလို့ မေးတော့၊ ဗိုလ်ချုပ်စိုးဝင်းက မရှိတော့ဘူးလို့ ပြောတယ်။ ကေအိုင်အိုက လျှပ်စစ် ဓာတ်အား ပေးနေတာကတော့ရော ဘယ်လိုလုပ်မလဲလို့ မေးတော့ - ဒါကတော့ ကုမ္ပဏီ တခုလို ဆက်လုပ်ပါစေ” ဟု ဖြေကြားခဲ့သည်ဟု ဆိုသည်။

MCC ဥက္ကဋ္ဌ သင်းအုပ်ဆရာကြီး ဇုန်းကယန်း (Rev. Zung Kyang) က ဆွေးနွေးပွဲတွင် စစ်ကို ဆန့်ကျင်ကြောင်းနှင့် ကေအိုင်အို၏ တောင်းဆိုချက်အပေါ် ဆောင်ရွက်ပေးရန် တောင်းဆိုသည်ဟု သိရသည်။

“MCC က အချက် ၂ ချက်ပဲ ပြောတယ်။ အပြစ်မဲ့ စစ်ပွဲ တိုက်ခိုက်မယ် ဆိုရင် လုံးဝ လက်မခံပါ၊ ဆန့်ကျင်ပါတယ်။ နောက် ကေအိုင်အိုက တောင်းဆိုထားတဲ့ ကိစ္စကိုလည်း ဆွေးနွေး ဆောင်ရွက်ပေးပါ၊ သူတို့ လိုအပ်ချက်ကို အလျှော့အတင်း တတ်နိုင်သလောက် ဆွေးနွေး ပေးဖို့ ကျနော်တို့ လိုလားပါတယ်” ဟု ကချင်နှစ်ခြင်း အသင်းတော် အကြီးအကဲတဦးက ပြောသည်။

မြစ်ကြီးနား၊ ဝိုင်းမော်၊ မိုးကောင်း၊ မိုးညှင်း၊ ဖားကန့်၊ ကားမိုင်း၊ တနိုင်း၊ ချီဖွေ၊ ဗန်းမော်မြို့ရှိ ကချင်နှစ်ခြင်း အသင်းတော်၊ ကာသိုလိပ်၊ အင်္ဂလီကန်၊ လွတ်လပ်သော အသင်းတော်တို့မှ ကိုယ်စားလှယ်များ တက်ရောက်ခဲ့ခြင်းဖြစ်သည်။

St. Columban ဘုရားကျောင်းမှ ဘုန်းတော်ကြီးတပါးက “အသွင် ကူးပြောင်းရေးနဲ့ ပတ်သက်ပြီးတော့ သဘောပေါက် နားလည်အောင်၊ နားမလည်တာတွေကို ဆွေးနွေးတယ်။ သူတို့ (နအဖ ကိုယ်စားလှယ်) ကတော့ ကောင်းတဲ့ လမ်းစဉ်၊ ငြိမ်းချမ်းရေး တည်မြဲဖို့ရန် အတွက် အားလုံး စည်းစည်းလုံးလုံးနဲ့ ဖွဲ့စည်းပုံ အခြေခံ ဥပဒေကို အကောင်အထည်ဖော် ဆောင်မယ်။ စစ်မှန်တဲ့ ဒီမိုကရေစီ ရရှိအောင်လို့ ပြောတာပဲ” ဟု မဇ္ဈိမကို ပြောပြသည်။

စစ်အစိုးရက ပြီးခဲ့သည့် ဧပြီလ ၂၈ ရက်နေ့တွင် နယ်ခြားစောင့်တပ် အဖြစ် အသွင်ကူးပြောင်းရန် ကမ်းလှမ်းခဲ့သည်။ ကမ်းလှမ်းထားသော နယ်ခြားစောင့်တပ် ဖွဲ့စည်းပုံအရ တပ်တခုတွင် အင်အား ၃၂၆ ဦးပါဝင်ပြီး မြန်မာ့ တပ်မတော်မှ ကိုယ်စားလှယ်များကိုလည်း အုပ်ချုပ်ရေး အပိုင်းတွင်ပါ လက်ခံရမည် ဖြစ်သည်။

သို့သော် တပ်မဟာ (၅) ခု၊ လှုပ်ရှားမှု တပ်မ (၁) ခုတို့ ဖြင့် ဖွဲ့စည်းထားသော ကေအိုင်အေ အနေဖြင့် ကချင်ပြည်နယ်အတွင်းသာမက ရှမ်းပြည်မြောက်ပိုင်းဒေသတွင်လည်း အခြေပြုနေရာချထားခြင်းကို ငြိမ်းချမ်းရေးရယူစဉ်က သဘောတူညီထားပြီးဖြစ်သည့်အတိုင်း ပြင်ဆင်လိုခြင်းမရှိကြောင်းနှင့် ကေအိုင်အေ အရာရှိ စစ်သည်များသာပါဝင်သော ကချင်ဒေသလုံခြုံရေးတပ်ဟူ၍ ခေါ်ဝေါ် ပြောင်းလဲလိုကြောင်း တုံ့ပြန်ခဲ့သည်။

ထို့အပြင် ၂၀၁၀ ပါတီစုံ ရွေးကောက်ပွဲ ပြီးနောက် ပေါ်ပေါက်လာသော အစိုးရသစ်သို့ နအဖက အာဏာလွှဲပြောင်းရာတွင်လည်း ကချင်ပြည်နယ်အစိုးရ အာဏာသုံးရပ်၌ ကေအိုင်အို အနေဖြင့် တိုက်ရိုက် ပါဝင် ဆောင်ရွက် နိုင်အောင် စီမံထားရန် ပန်ကြားထားသည်။

ကိုယ်ပိုင်ပြဌာန်းခွင့်အတွက် လက်နက်ကိုင်တော်လှန်ခဲ့သော ကေအိုင်အိုသည် ဖေဖော်ဝါရီ ၂၄ ရက်၊ ၁၉၉၄ ခုနှစ်တွင် စစ်အစိုးရနှင့် အပစ်အခတ်ရပ်စဲရေး သဘောတူညီမှု လက်မှတ် ရေးထိုးခဲ့သည်။

source by : မဇ္ဈိမ