ရန်ကုန်တွင် နိုင်ငံရေးအကျဉ်းသားများ လွှတ်ပေးရေး စာရွက်များ ဖြန့်ကြဲ

ရန်ကုန်တွင် နိုင်ငံရေးအကျဉ်းသားများ လွှတ်ပေးရေး စာရွက်များ ဖြန့်ကြဲ

မင်းနိုင်သူ | ဒေါ်အောင်ဆန်းစုကြည်အမှုပါ စွပ်စွဲခံများအတွက် အပြီးသတ် လျှောက်လဲရက် ပေးနေသည့် အချိန်တွင် ဒေါ်အောင်ဆန်းစုကြည် နှင့် နိုင်ငံရေးအကျဉ်းသားများ လွတ်မြောက်ရေး တောင်းဆိုစာ များ ရန်ကုန်မြို့၌ ယနေ့ ဖြန့်ဝေခဲ့ကြောင်း သိရသည်။

ရန်ကုန်မြို့လူစည်ကားရာ နေရာများဖြစ်သည့် လမ်းမတော် သံဈေး၊ ညောင်ပင်လေးဈေး၊ မင်္ဂလာဈေး၊ ယုဇန ပလာဇာနှင့် လှည်းတန်း တို့တွင် မျိုးဆက်သစ် လူငယ်များ အစည်းအရုံး (GW) အဖွဲ့ဝင်များ က ဒေါ်အောင်ဆန်းစုကြည် နှင့် နိုင်ငံရေးအကျဉ်းသားများ လွှတ်ပေးရေး တောင်းဆို စာများကို ဖြန့်ဝေခဲ့ကြခြင်းဖြစ်သည်။

“နအဖစစ်အစိုးရဟာ ဒေါ်အောင်ဆန်းစုကြည်အပေါ်မှာ မတရား ဖမ်းဆီးချုပ်နှောင် တရားစွဲဆိုထားတာကို လူတွေ ပိုမိုသိမြင် လာပြီး နိုင်ငံရေးစိတ်ဓာတ် တက်ကြွနေစေဖို့ ဒီလို လက်ကမ်း စာစောင် ဖြန့်ဝေမှုကို လုပ်ခဲ့တာပါ။ အထူးသဖြင့် ကျနော်တို့လို လူငယ်တွေ နိုင်ငံရေးစိတ်ဓာတ်နှိုးကြားနေစေဖို့ပါ” ဟု မျိုးဆက်သစ် လူငယ်များ အစည်းအရုံး (GW) မှ ပြောရေးဆိုခွင့်ရှိသူ ကိုလင်းရန်နိုင်က ပြောသည်။

မျိုးဆက်သစ်လူငယ်အစည်းအရုံးမှ ဖြန့်ဝေခဲ့သော လက်ကမ်းစာစောင်များတွင် FREE BURMA၊ FREE AUNG SAN SU KYI နှင့် နိုင်ငံရေး အကျဉ်းသားများ ချက်ချင်းလွှတ်ဆိုသော စာသားများရေးသားထားပြီး ကားမှတ်တိုင်များတွင် ဖြန့်ဝေခြင်း၊ ယာဉ်ရပ်နား စခန်းများမှ ကြဲချခြင်းများ ပြုလုပ်ခဲ့ကြသည်။

source by : ခေတ်ပြိုင်